မန္တလေးမြေငလျင်ဘေးဒဏ်သင့်ဒေသတွင် ကူညီကယ်ဆယ်ရေးလုပ်ငန်းများ ဆောင်ရွက်ရန်အတွက် တရုတ်နိုင်ငံမှလာရောက်သည့် Ms.Chen Suzhen ခေါင်းဆောင်သော အဖွဲ့၀င် ၂၃ ဦးပါ မြေငလျင်ကယ်ဆယ်ရေးအဖွဲ့သည် ၃၀-၃-၂၀၂၅ ရက်နေ့ ၁၈၃၀ နာရီချိန်တွင် ထိုင်းနိုင်ငံ ဘန်ကောက်မြို့မှတဆင့် မင်္ဂလာဒုံ အပြည်ပြည်ဆိုင်ရာလေဆိပ်သို့ ရောက်ရှိလာခဲ့ရာ မြန်မာ-တရုတ်ချစ်ကြည်ရေးအသင်း(ဗဟို) ဥက္ကဋ္ဌ ဦးတင်ဦးနှင့် ဒုတိယဥက္ကဋ္ဌများက မင်္ဂလာဒုံ အပြည်ပြည် ဆိုင်ရာ လေဆိပ်တွင် သွားရောက်ကြိုဆိုခဲ့ပြီး မန္တလေးမြို့သို့ ဆက်လက်ထွက်ခွာနိုင်ရေး စီစဉ်ဆောင်ရွက်ပေးခြင်းနှင့် လိုအပ်သည့် ကူညီပံ့ပိုးမှုများ ဆောင်ရွက်ပေးခဲ့ပါသည်။
အဆိုပါ မြေငလျင်ကယ်ဆယ်ရေးအဖွဲ့သည် အီတလီနိုင်ငံ၊ သီရိလင်္ကာနိုင်ငံနှင့် အာဖရိကတိုက်ရှိ နိုင်ငံများတွင် မြေငလျင်ကယ်ဆယ်ရေး အတွေ့အကြုံများစွာရှိခဲ့ကြောင်း သိရှိရပြီး ၎င်းအဖွဲ့နှင့် ထပ်မံရောက်ရှိလာသည့် ၈ ဦးပါ ကယ်ဆယ်ရေးအဖွဲ့တို့ ပူးပေါင်းအဖွဲ့ ၃၁ ဦးသည် မြန်မာ-တရုတ်ချစ်ကြည်ရေးအသင်း(ဗဟို) ဥက္ကဋ္ဌ ဦးတင်ဦး၏ စီမံဆောင်ရွက်ပေးမှုအရ ၃၁-၃-၂၀၂၅ ရက်နေ့ ၀၆၀၀ နာရီချိန်တွင် မင်္ဂလာဒုံအပြည်ပြည်ဆိုင်ရာ လေဆိပ်မှ ဆက်လက်ထွက်ခွာသွားခဲ့ရာ မန္တလေးအပြည်ပြည်ဆိုင်ရာ လေဆိပ်သို့ ၀၇၂၀ နာရီချိန်ခန့်တွင် ရောက်ရှိသွားခဲ့ပြီး ကယ်ဆယ်ရေး လုပ်ငန်းများအား အချိန်နှင့်တပြေးညီ ဆောင်ရွက်နေပြီဖြစ်ကြောင်း သိရှိရပါသည်။