တနင်္သာရီတိုင်းဒေသကြီး၊ မြိတ်မြို့ အများပိုင်အစည်းအဝေးခန်းမ၌ ဇန်နဝါရီလ(၇)ရက်နေ့တွင် တရုတ်ပြည်မှ ရေလုပ်ငန်းပညာရှင်(၄)ဦး ပါဝင်သောအဖွဲ့နှင့်တွေ့ဆုံ၍ ရေလုပ်ငန်းပညာများ ဖွံ့ဖြိုးတိုးတက်ရေး၊ ငါး/ပုဇွန်မွေးမြူရေးလုပ်ငန်းများနှင့် ဈေးကွက် ပူးပေါင်းဆောင်ရွက်ရေးကိစ္စများ ဆွေးနွေးညှိနှိုင်းခဲ့ကြသည်။
ဆက်လက်၍ မြိတ်အများပိုင်ကော်ပိုရေးရှင်းဥက္ကဌ ဦးလှသန်း နှင့်အဖွဲ့ဦးဆောင်၍ တရုတ် ကိုယ်စားလှယ်အဖွဲ့အား ပုဇွန်မွေးမြူရေးလုပ်ငန်းနေရာများ၊ ကျွန်းစုများတစ်ဝိုက် ရေချို/ရေငံ ငါး၊ ပုဇွန်မွေးမြူ နိုင်သော နေရာဒေသများနှင့် အစာချက်စက်ရုံနေရာများ၊ ငါးလေလံဈေးကွက် တည်ဆောက်ထားရှိသည့်နေရာများသို့ လှည့်လည်ပြသခဲ့သည်။
ထို့နောက် မြိတ်မြို့သို့ ရောက်ရှိနေသော တနင်္သာရီတိုင်းဒေသကြီး ဝန်ကြီးချုပ် ဦးမြတ်ကို အား တွေ့ဆုံ ဂါရဝပြုရာ ဝန်ကြီးချုပ်က မြိတ်မြို့ဒေသဖွံ့ဖြိုးရေး၊ ပူးပေါင်းဆောင်ရွက်ရေး လက်တွေ့အကောင်အထည်ဖော် ဆောင်ရွက်နိုင်ရေး ကြိုဆိုတိုက်တွန်း အားပေးစကားပြောကြားခဲ့ကာ၊ မြိတ်အများပိုင်ကော်ပိုရေးရှင်း ဥက္ကဌ နှင့် အဖွဲ့တည်ခင်းဧည့်ခံသော ညစာစားပွဲသို့ တရုတ်ကိုယ်စားလှယ်အဖွဲ့နှင့်အတူ တက်ရောက်ခဲ့ကြပါသည်။
ဆက်လက်၍ မြန်မာ-တရုတ်ချစ်ကြည်ရေးအသင်းခွဲ(မြိတ်)အား ဒေသခံမြန်မာပြည်ဖွား တရုတ် ဘုံကျောင်းလူကြီးများ၊ စိတ်ဝင်စားသူများနှင့် တွေ့ဆုံ၍ ချစ်ကြည်ရေးအသင်း(ဗဟို) ဥက္ကဌ မှ ချစ်ကြည်ရေး အသင်းကြီး၏ ရည်ရွယ်ချက်များ၊ အသင်းခွဲ(၇)ခု ဖွဲ့စည်းပြီး မြန်မာ-တရုတ်ချစ်ကြည်ရေးဆောင်ရွက်ချက်များ၊ ဒေသဖွံ့ဖြိုးရးအတွက် ရေလုပ်ငန်းများ အကျိုးတူပူးပေါင်းဆောင်ရွက်ရေးကိစ္စရပ်များ ရှင်းလင်းဆွေးနွေးခဲ့ကြပြီး ချစ်ကြည်ရေးအသင်းခွဲ(မြိတ်)အား စတင်ဖွဲ့စည်းခဲ့ကြောင်း သိရှိရသည်။